«Coido que a clave é que a idea detrás da ilustración sexa boa. Non son un apaixonado do virtuosismo.»
Cursou un mestrado en Deseño Gráfico no London College of Communication. Traballa como infografista e ilustrador freelance e ten colaborado con publicacións como National Geographic Magazine, Smithsonian Magazine, Corriere della Sera ou Mongolia. Comezou a súa actividade profesional en La Voz de Galicia, e foi xefe de infografía no diario Público. O seu traballo foi recoñecido pola Society of News Design e mais polos premios Malofiej. Impartiu seminarios en Madrid, Nova Deli e Kuala Lumpur. O seu traballo foi recollido nos volumes Information Graphics (Taschen) e Visual Storytelling (Gestalten).