«O mellor da profesión é a posibilidade de crear da nada, coas mesmas ferramentas, proxectos moi diversos.»
Estudou Deseño Gráfico na Escola de Artes Pablo Picasso e durante uns anos compaxinou labores de ilustración e deseño. En 1999 comezou a traballar en La Opinión de A Coruña, xa exclusivamente como humorista gráfico e ilustrador, e, pouco despois, en Bren Entertainment, facendo storyboards e deseño de produción para animación. En 2002 estableceuse como ilustrador independente e fundou con outros ilustradores o estudio Baobab. Desde entón traballa facendo ilustración editorial, publicidade e principalmente cómic, como debuxante ou colorista; como colorista ten colaborado coas principais editoriais de cómic dos mercados americano e franco-belga, como Marvel, DC, Dargaud ou Le Lombard.
